RUS
SMARTNEWS.KZ басылымының хабарлауынша, Ресейдің Севастополь өңірінде 15 жастағы мектеп оқушысы алаяқтарға көмектескені үшін ұсталды. Бұл туралы Ресей ІІМ-нің баспасөз қызметі Telegram-арнасында хабарлады.
Тергеу деректері бойынша, бәрі 81 және 86 жастағы екі зейнеткердің шағымынан басталған. Олар өздерін құқық қорғау органдарының қызметкерлері ретінде таныстырған алаяқтарға алданып, ақшаларынан айырылған.
Қарттар жол апатына түсті деп ойлаған туыстарын "құтқару" үшін жинаған қаражаттарын такси жүргізушілеріне беріп жіберген. Ал жүргізушілер ақшаны мектеп оқушысына жеткізген. Оның міндеті – ұрланған ақшаны алаяқтардың есепшоттарына аудару болған. Бұл "жұмысы" үшін жасөспірім 10 мың рубль сыйақы алған.
Тергеу кезінде оқушы интернеттен қосымша табыс табудың жолдарын іздеп жүріп, осындай жұмысқа тап болғанын айтты. Қазіргі уақытта жасөспірімге қатысты материалдар Севастополь қалалық ІІМ-нің кәмелетке толмағандар істері жөніндегі бөліміне жіберілді. Онда оған қатысты профилактикалық шаралар қабылданбақ.