RUS
SMARTNEWS.KZ басылымының хабарлауынша, Қостанай облысында қызметтік міндетін атқарып жүрген учаскелік инспектор, полиция подполковнигі Батырсаим Зайтинов жол-көлік оқиғасына ұшырап, оқиға орнында көз жұмды. Қайғылы жағдай туралы ҚР Ішкі істер министрі Ержан Сәденов әлеуметтік желі арқылы хабарлады.
Министр Instagram парақшасында жазба жариялап, марқұмның отбасына, жақындары мен әріптестеріне қайғыра көңіл айтты. Оның жазбасында Батырсаим Зайтиновтың қызметіне адал, тәжірибелі әрі жауапкершілігі жоғары маман болғаны атап өтілген.
"Қызметтік міндеттерін атқару кезінде ЖКО-да қаза тапқан Қостанай облысы Полиция департаментінің учаскелік полиция инспекторы, полиция подполковнигі Батырсаим Зайтиновтың туыстары мен жақындарына көңіл айтамын.Оның есімі әріптестерінің жадында мәңгі қалады. Ішкі істер министрлігі оның отбасына қажетті қолдауды көрсетеді", - делінген министр жазбасында.
Оқиға орны мен мән-жайы туралы нақты ақпарат әзірге жарияланған жоқ. Алайда жол апатына не себеп болғаны анықталу үшін тиісті тергеу жұмыстары басталды.