RUS
SMARTNEWS.KZ басылымының хабарлауынша, Сенат Алматы қаласынан АҚШ консулдығының құрылысы үшін жер телімін жалға беру туралы үкіметаралық келісімді ратификациялау жөніндегі заңды мақұлдады. Бұл келісім Мемлекет басшысының Біріккен Ұлттар Ұйымының 74-сессиясынан кейін берген тапсырмасын орындау мақсатында әзірленген.
Құжатқа сәйкес, АҚШ Үкіметіне Алматы қаласынан 70 593 шаршы метр аумақ 49 жылға жалға беріледі. Сенат депутаты Амангелді Нұғмановтың айтуынша, бұл халықаралық дипломатиялық тәжірибеге толық сай келеді. Мәселен, Ұлыбритания КХДР елшілігіне, ал Гонконг АҚШ консулдығына ұзақ мерзімді — 999 жылдық жалға беру тәжірибесін қолданған. Яғни, бұл – сенімге негізделген және ұзақмерзімді ынтымақтастықтың қалыпты үлгісі.
Сенатор Нұғмановтың айтуынша, Алматыда ашылатын АҚШ-тың Бас консулдығының құрамында есірткімен күрес агенттігі мен АҚШ Сауда министрлігінің Қазақстандағы өкілдігі жұмыс істейтін болады. Бұл мекемелер америкалық компаниялардың қазақстандық нарыққа шығуына көмектесіп, екі ел арасындағы сауда және экономикалық байланыстарды тереңдетуге ықпал етеді.
Келісімде жалға беру шарттары нақты жазылған. Жалға алу құны — 25 миллион АҚШ доллары. Бұл сома келісім күшіне енгеннен кейін 30 күн ішінде толық төленеді. Сонымен қатар, АҚШ тарапы жер телімі мен консулдыққа қатысты барлық салық пен басқа да төлемдерден босатылады. Консулдықтың құрылысы, жөндеуі, коммуналдық шығындары мен техникалық қызмет көрсету толықтай АҚШ үкіметінің есебінен қаржыландырылады. Ал нысанды жабдықтау мен жиһазбен қамту үшін қажетті барлық тауарлар мен материалдар кедендік баж салығынан және рұқсат рәсімдерінен босатылады.
Келісімде тағы бір маңызды тармақ бар — АҚШ тарапы келісім ратификацияланған соң, Қазақстанның Хьюстон қаласында Бас консулдық ашуына рұқсат береді. Бұл қала – жасанды интеллект, энергетика, медицина және инновация салаларындағы ірі орталық саналады.
— Хьюстондағы консулдық қазақ диаспорасы үшін де маңызды. Онда консулдық және нотариалдық қызметтерге қолжетімділік артады. Сонымен бірге, бұл қадам инвестициялық ынтымақтастықты нығайтып, Қазақстан мен АҚШ арасындағы экономикалық байланыстарды дамытуға жол ашады. Алматыдағы АҚШ консулдығы Орталық Азиядағы ең ірі визалық орталыққа айналмақ. Бұл еліміздің инвестициялық тартымдылығын арттырып, шетелдік инвестиция тартуға, жаңа жұмыс орындарын ашуға және қызмет көрсету саласының дамуына серпін береді, — деді Амангелді Нұғманов.
Сөз соңында сенатор бұл келісімді ратификациялау арқылы халықаралық серіктестердің Қазақстанға деген сенімі нығая түсетінін атап өтті.