RUS
SMARTNEWS.KZ басылымының хабарлауынша, Астанада 7 мамырдағы Жеңіс парадында болған жағымсыз жағдайға байланысты тыл еңбеккері, профессор Теңдік Исақовтан ресми түрде кешірім сұралды.
Қалалық жұмыспен қамту және әлеуметтік қорғау басқармасының басшысы Илья Скуб пен Ішкі саясат басқармасының басшысы Нұрдәулет Әлмұханов ардагер мен оның отбасымен кездесіп, жылдар бойғы еңбегі үшін алғыстарын білдіріп, 7 мамыр күні парад трибунасына өте алмағаны үшін кешірім айтты.
Астана әкімдігінің баспасөз қызметі түсіндіргендей, парадқа өту арнайы тізім бойынша жүзеге асқан. Ардагерлердің жасы мен орын санының шектеулі болуына байланысты тізім тек тікелей туыстарынан келіп түскен өтініштер негізінде жасалған. Бұл парадқа елдің барлық өңірінен ардагерлер мен тыл еңбеккерлері шақырылған. Алайда Теңдік Исақовтың отбасы тарапынан ондай өтініш келіп түспегені айтылды.
Әкімдік Теңдік Исақов пен оның туыстарына болған жағдайға шын жүректен кешірім сұрап, ардагерді 9 мамырда өтетін гүл шоқтарын қою салтанатына арнайы шақырды.
Айта кетейік, бұған дейін әлеуметтік желілер мен кейбір БАҚ-та ардагерді Жеңіс парадына кіргізбегені туралы ақпарат тараған болатын.