RUS
SMARTNEWS.KZ басылымының хабарлауынша, «Елге көмек бер» қайырымдылық қорының жетекшісі Ілияс Сариевке қатысты тағы бір дау шықты. Бұл жолы ол 5 айлық зағип сәбидің еміне жиналған қаражатты толық бермеді деген айып тағылып отыр.
Журналист Руслан Өтепбайдың айтуынша, Ілияс Сариев 2024 жылы екі көзі көрмейтін сәби үшін халықтан 15 миллион теңге жинау мақсатында қайырымдылық акциясын бастаған. Мақсат — баланы Түркияда емдету. Алайда жиналған қаржы ата-ананың қолына толықтай жетпеген.
— Ілияс ата-анасына «ақша жиналды, Түркияға бара беріңіздер» деп сендірген. Бірақ қаражатты аудармаған. Сәбидің әжесі Раушан ханым немересін алып, Түркияға өз қаражатына аттануға мәжбүр болды. Тек бесінші күні ғана Ілияс 3 миллион теңге аударған. Ал қалған сома берілмеген соң, бала қажетті ем-домды толық ала алмай елге қайтты, — дейді журналист.
Бұл жағдай — Сариевке қатысты шыққан алғашқы дау емес. Бұған дейін де ол бірнеше рет алаяқтық жасады деген күдікке іліккен.
— Ілияс Сариевке қатысты бірнеше азаматтан ресми шағым түсті. Қазіргі уақытта ол алаяқтық фактісі бойынша ұсталған. Тергеу амалдары жүріп жатыр, — деп жазды журналист Жанболат Орынбеков әлеуметтік желідегі парақшасында.
Еске салайық, Ілияс Сариев бұған дейін «Қазақтың Робин Гуды» атанып, түрлі қайырымдылық жобаларымен танылған еді. Алайда соңғы уақытта оның әрекеттеріне қатысты сын күшейіп, қоғамда үлкен дау туғызды.