RUS
SMARTNEWS.KZ басылымының хабарлауынша, Өзбекстанның шығысындағы Қоқан қаласында орналасқан бір мейрамханада келушілерге ерекше мәзір ұсыныла бастады — торғай еті. Бұл жайт жергілікті халық пен экологтар арасында наразылық туғызды.
Podrobno.uz мәліметінше, Ферғана облысындағы Қоқан қаласындағы қоғамдық тамақтану орны торғай етінен жасалған тағамды мәзірге енгізген. Бір порциясының бағасы шамамен 6 мың өзбек сомы (250 теңге шамасында).
Жергілікті тұрғындар бұл жаңалыққа таңданыс пен ашумен қараған. Дегенмен, бұл алғашқы жағдай емес: бұрын да Янгигурған ауылындағы бір дәмханада торғай еті ұсынылған.
Экологтар дабыл қағуда
Эколог мамандар торғайлардың экожүйедегі маңызды рөлін еске салып, бұл әрекеттің салдары ауыр болуы мүмкін екенін ескертті. Торғайлар зиянкес жәндіктермен қоректеніп, ауыл шаруашылығын қорғайды.
Мамандардың айтуынша, бір торғай жұбы ай сайын 3 келіге дейін зиянкесті жойып отырады. Ал олардың саны азайса, зиянкес жәндіктер күрт көбейіп, егінге зор қауіп төндіреді. Бұл өз кезегінде аграрлық салаға елеулі залал келтіруі мүмкін.
Қысқасы, "құстың еті тойғызар" деп мәз болғандар, ертең зиянкестің кесірінен нансыз қалуы мүмкін.