RUS
Футболда тактика, дайындық пен шеберлік маңызды дейді. Бірақ «Атырау» футбол клубы бұл жолы мүлде басқа әдіске жүгінді: олар кезекті жеңілістен құтылу үшін матч алдында қойды құрбандыққа шалды. Қысқаша айтқанда — доп емес, дәстүр тепті.
SMARTNEWS.KZ басылымының хабарлауынша, Қазақстан Премьер-лигасындағы кезекті ойында «Ордабасыға» қарсы алаңға шығатын «Атырау» командасы бірінен соң бірі тізілген жеті жеңілістен кейін, жеңілістердің «көзін байлау» үшін рәсім жасап, сәттілік шақырмақ болған.
«Тіл-көзден аман болайық» деген ниетпен шалынған құрбандықтан кейін жанкүйерлер «енді бәрі өзгереді» деп үміттенген. Бірақ алаңда ешқандай ғажайып болмады: «Атырау» тағы да ұтылды — бұл жолы 1:2 есебімен.
Осылайша, команданың сегізінші жеңілісі тіркелді.
Көрермендер арасында «Қойды дұрыс шалмаған сияқты», «Футболдың құдайы ренжіп қалған ба екен?» деген әжуалы пікірлер де айтылып жатыр.
Қысқасы, құрбандық шалынғанымен, «Ордабасы» сәттілікті өзімен бірге ала келген сияқты. Ал «Атырауға» енді бапкер ауыстыра ма, әлде жаңа ритуал қолдана ма — бір шешім керек секілді.