RUS
SMARTNEWS.KZ басылымының хабарлауынша, Бас прокурор Берік Асылов Мәжіліс депутатының сауалына жауап бере отырып, банк қызметкерлері мен микрокредит ұйымдарына қатысты алаяқтыққа байланысты 61 қылмыстық іс тергеліп жатқанын мәлімдеді.
— Қаржы секторындағы заң бұзу фактілері бойынша банктер мен микроқаржы ұйымдарының қызметкерлеріне қатысты, оның ішінде алаяқтық (ҚК-нің 190-бабы), өкілеттіктерді теріс пайдалану (ҚК-нің 250-бабы), сондай-ақ міндеттеріне адал қарамау (ҚК-нің 254-бабы)фактілері бойынша 61 сотқа дейінгі тергеп-тексеру жүргізіліп жатыр, — деп жазады Бас прокурор.
Берік Асылов осыған ұқсас жағдайларды болдырмау үшін жыл басынан бері шағын кредит беру талаптары күшейтілгенін еске салады.
— Қазіргі таңда клиентті биометриялық сəйкестендіру жəне ЭЦҚ құралдары бір мезгілде қолданылған кезде ғана шарт жасасуға рұқсат етіледі. Ал қарыз алушының шотына ақшалай қаражат аудару клиентке оның банк шотының немесе төлем картасының тиесілі екенін анықтағаннан кейін жүзеге асырылады, — деп жазылған жауапта.
Сондай-ақ ол банк секторындағы алаяқтыққа қарсы қауіпсіздік шараларын күшейту бағытында атқарылған жұмыстар туралы да ақпарат ұсынған.