RUS
SMARTNEWS.KZ басылымының хабарлауынша, Германияның жаңа канцлері Фридрих Мерц пен Франция президенті Эммануэль Макрон Киевте өткен «қалау білдіргендер коалициясы» саммитінде Ресей бітім талабын орындамаса, жаңа санкциялар салынатынын ескертті.
Канцлер Мерц Ресейге қарсы санкциялар едәуір қатаңдайтынын айтып, Украинаға саяси, қаржылай және әскери тұрғыдан кең көлемде қолдау көрсетілетінін жеткізді.
Bild басылымына берген сұхбатында ол АҚШ пен Дональд Трамптың жеке өзі бұл бағытты қолдайтынын, сондай-ақ Путинге деген сабыр таусылып бара жатқанын айтты. Мерцтың сөзінше, қазір АҚШ пен Еуропа одақтастары арасында келіспеушіліктен гөрі, таңғаларлық деңгейдегі ынтымақ бар.
Ал Путинмен жеке кездесу өткізу мүмкіндігіне қатысты сұраққа ол нақты жауап бермей, былай деді:
«Егер соғысқа нүкте қоюға көмегі тисе, қажет болса мен көп нәрсеге дайынмын. Бірақ алдымен осы демалыс күндерінен кейін атысты тоқтату мақсатына қол жеткізе аламыз ба – соны бағамдайық», – деді ол.
Макрон да осыған ұқсас ұстаным білдіріп, егер Ресей 30 күндік бітім талаптарын қабылдамаса, бірнеше күн ішінде жаңа санкциялар пакеті енгізілуі мүмкін екенін айтты.
«Алдағы күндері біз жаңа санкциялар енгізуге дайын болуымыз керек», – деді ол LCI телеарнасына берген сұхбатында.
Ал Кремль болса бұл мәлімдемелерге жауап беріп, «Ресей санкцияларға үйреніп қалды және олардың салдарын қалай азайту керегін біледі» деп мәлімдеді.