RUS
SMARTNEWS.KZ басылымының хабарлауынша, желіде Тұзбайырдың жаңбырдан кейінгі "айнаға" айналған сәті бейнеленген видео пайда болды
Қазақстандық видеограф Адай Мырзатай Instagram парақшасында жаңбырдан кейінгі Тұзбайыр тұзды шөлі бейнеленген бейнетүсірілімін жариялады.
Әуеден түсірілген видеода жауыннан соң көлге айналған тұзды жазық алып айна секілді жылтырап жатыр. Бірнеше шақырымға созылған жазық жаңбыр суымен жабылып, ерекше көрініске айналған. Адай өзінің видеосын қысқа ғана сипаттаған:
«Керемет Тұзбайыр».
Бұл бейнежазба әлеуметтік желі қолданушыларының таңдайын қақтырды.
«Нағыз ертегі әлемі!», «Мынау фантастика! Бізде осындай ғажайып барын бұрын неге білмедім?», «АҚШ-тағы Юта мен Невада шекарасындағы тұзды жазыққа ұқсайды. Бірақ бұл – өз елімізде!» – деп жазды олар пікірлерінде.
Бұған дейін блогер Абай Жанысбаев та Маңғыстау даласының гүлденген сәтін көрсетіп, табиғат әсемдігін паш еткен болатын.
Тұзбайыр – Маңғыстау облысындағы табиғи тұзды шөл, Бекет-Ата мешітінен солтүстік-шығысқа қарай орналасқан. Жазық жер жазда аппақ тұз қабатымен жабылса, көктем мен күзде жауын-шашыннан соң көлге айналады. Бұл жер уақытша су жиналатын тұзды ойпат – Қазақстандағы ең ерекше ландшафттардың бірі. Туристер мен фотографтар үшін нағыз визуалды жұмақ.