RUS
SMARTNEWS.KZ басылымының хабарлауынша, жапон музыкантының Токиодағы көше бойында қазақтың күйлерін домбырамен шебер орындағаны түсірілген видео әлеуметтік желілерде қызу талқыланып жатыр. Бұл туралы Tengri Life жазды.
Қазақ даласының сарыны алыстағы Жапония астанасында естілгенде, бейнежазбаның авторы — қазақ жігіті — таңданысын жасыра алмады. Кейін белгілі болғандай, күй орындаған адам — бұрын Алматыда да қазақша күй тартып, көпшілікті таңғалдырған Акира Такегучи.
Видео авторы көшеде кетіп бара жатып, кенеттен таныс әуендерді естіп қалып, бірден камерасын қосқан.
«Қазір көшеде келе жатсам, біртүрлі таныс әуен естіле бастады. Құдды бір түс көріп тұрғандаймын – нағыз қазақ күйі!» – дейді ол таңданысын жасыра алмай.
Күй аяқталғаннан кейін, қазақ жігіті Акирадан домбыраны қалай үйренгенін сұрайды. Музыкант өз әңгімесінде домбырамен алғаш Ыстамбұлда танысқанын айтады — ол жақта бір қазақ жігіті Акираға алғашқы сабақтарды үйреткен. Кейін Алматыдағы Құрманғазы атындағы консерваторияда білім алған Тұрысбек есімді отандасымыз да көмектесіпті. Қалғанын жапон музыканты өз бетінше нота арқылы меңгеріп, шеберлігін күн сайын дамытқан.
Акира Такегучи қазақ жұртына бұрыннан таныс. 2023 жылдың ақпанында ол Алматы Арбатында күй шертіп, отандастарымыздың ыстық ықыласына бөленген. Ол кезде де көпшілікті өзінің домбыраға деген ерекше махаббатымен тәнті еткен еді.
— «Бұрын скрипкада түрік музыкасын орындайтынмын. Бірақ домбыраның үні мені баурап алды. Екі-ақ ішек – бірақ ғажап күшке ие. Нұрғиса Тілендиевтің “Аққу” күйін орындап, Жапониядағы музыкалық байқауда жеңімпаз атандым», – деген болатын Акира.
Акира Такегучидің оқиғасы – мәдени алмасудың нағыз үлгісі, ұлттық өнеріміздің шекарадан асып, өзге жұрттың жүрегінен орын тапқанын дәлелдейтін ерекше оқиға.