RUS
SMARTNEWS.KZ басылымының хабарлауынша, қазақ күресінің жұлдызы, «Қазақстан Барысы» турнирінің үш дүркін жеңімпазы Бейбіт Ыстыбаев 40 жасқа толып, мерейтойын туған жері — Таразда дүркіретіп атап өтті.
Алаштың арда ұлының айтулы тойына туған-туысы мен жанұясынан бөлек, спорттағы серіктестері, күрес аренасында бірге тер төккен достары және елге танымал спортшылар мен бапкерлер арнайы келіп, ақжарма тілектерін арнады.
Мерейтойлық кеш ұлттық рух пен дәстүрге тұнып тұрды — сахнада айтыскер ақындар жырдан шашу шашып, балуанның ерлігі мен елге сіңірген еңбегін жырға қосты. Кештің сәнін келтірген сәттердің бірі — Бейбітпен 2016 жылғы «Қазақстан Барысы» финалында белдескен балуан Жұманазар Ерсұлтанның арнайы келіп, бұрынғы қарсыласын шын жүректен құттықтауы болды. Ол финал — турнир тарихындағы ең тартысты белдесулердің бірі ретінде есте қалған.
Бейбіт Ыстыбаев — қазақ күресінің айбары. Ол 2012, 2015 және 2016 жылдары «Қазақстан Барысы» атағын үш рет жеңіп алған алғашқы балуан. Бұдан бөлек, 2011 жылы күміс белбеу иегері атанған.