RUS
SMARTNEWS.KZ басылымының хабарлауынша, 10 мамыр күні Кербұлақ ауданындағы Көксу өзенінде қайғылы оқиға болды.
Ер адам темір арқанмен өзеннен өтпек болғанда тепе-теңдігін жоғалтып, суға құлап кеткен. Оны ағыс алып кеткен. Қазірге дейін мәйіті табылған жоқ.
Әлеуметтік желіде тараған видеода:
«Расталмаған ақпаратқа сәйкес, суға батқан адам – Отардан келген әскери қызметкер болуы мүмкін. Ресми мәлімет әзірге жоқ. Бұл жағдайды растай алатын немесе жоққа шығаратын адамдардан жауап күтеміз», – делінген.
Жетісу облыстық полиция департаменті мынадай мәлімдеме жасады:
«Азамат Н-ның жоғалу фактісі бойынша қылмыстық іс қозғалды. Іздестіру жұмыстары ауқымды түрде жүргізілуде. Оған полиция, әскери қызметкерлер, құтқарушылар, өзге де мемлекеттік органдар мен еріктілер жұмылдырылған. Қазіргі таңда іздестіру жалғасып жатыр».
Төтенше жағдайлар департаментінің хабарлауынша, жоғалған азамат 1989 жылы туған.
11 мамырда таңғы 06:30-дан бастап кең ауқымды іздеу жұмыстары басталған. Оған ТЖД мамандары, орман күзеті, жергілікті атқарушы органдар, полиция, әскери полиция және Қорғаныс министрлігі бөлімшелері қатысқан. Барлығы 98 адам мен 22 техника бірлігі жұмылдырылған. Олардың ішінде қайықтар, дрондар және спутниктік байланыс құралдары да бар.
«Іздеу жұмыстары Көксу өзенінің бойымен екі жағалау бойынша сегіз топпен (оң жағалауда 4, сол жағалауда 4) 35 шақырымға дейінгі аумақта жүргізілді. Кешкі 18:30-да қараңғылық түскен соң, жұмыстар уақытша тоқтатылды. Іздеу 12 мамыр күні жалғасады», – делінген хабарламада.