RUS
SMARTNEWS.KZ басылымының хабарлауынша, Қарағанды облысында ауылдың бұрынғы әкімі 23 жастағы қызды зорлады деген күдікке ілінді. Бұл ақпаратты Tengrinews.kz тілшісіне облыстық полиция департаменті растады.
Бұған дейін БАҚ-та ауыл әкімінің зорлық ісіне қатысты тергеліп жатқаны жөнінде хабар тараған болатын. Полицияның мәліметінше, Шет ауданында тұратын 23 жастағы қыз өзі арыз жазған. Аталған факті бойынша қылмыстық іс қозғалды.
— Сол күні-ақ күдікті ұсталып, уақытша ұстау изоляторына қамалды. Кейін соттың санкциясымен оған үйқамақ түріндегі бұлтартпау шарасы таңдалды. Алайда прокуратураның жеке шағымынан кейін бұл шешім өзгеріп, күдікті қайтадан қамауға алынды. Қазір тергеу жүріп жатыр, — деп хабарлады полиция өкілдері.
Осылайша, тергеу басталғалы шенеунік уақытша изоляторда болып, кейін үйқамаққа шыққан, кейін қайта тергеу изоляторына қамалған. Тергеу мүддесіне байланысты басқа ақпарат жарияланбай отыр.
Ал Шет ауданының әкімдігі бұл оқиғаға қатысты өз мәлімдемесін жасады:
— Қылмыстық іс қозғалған сәтте ол әкім қызметін атқармаған. Бұл — жеке сипаттағы іс, — делінген әкімдік хабарламасында.
Айта кетейік, Telegram-дағы «Патриот» арнасында қыздың отбасы ұсынған мәліметтер жарияланды. Қарағандылық ерлі-зайыптылардың айтуынша, күдікті — олардың отбасылық досы болған, ал қыздары әкімдікте жұмыс істеген.