«Ұлымның әкесіне таңғаламын»: Дана Нұржігіт марқұм күйеуі Владимир Рерих туралы

SMARTNEWS.KZ басылымының хабарлауынша, белгілі тележүргізуші, қоғам белсендісі Дана Нұржігіт аналық сезім туралы әсерлі жазбасымен бөлісіп, өміріндегі ең маңызды миссия – ана атану жолының оңай болмағанын айтты.

— Ана болуға дейінгі жолым ұзақ әрі күрделі болды. Өмірде ештеңе оңай келген емес, ал ана болу – мен үшін нағыз эпопеяға айналды. Қиындықтан сүрініп құлап, қайта тұрып, тәуекелге барып, үміттеніп, сену – менің осы жолымның айнасы. Қазір артқа көз тастасам, өзіме де, жалғыз ұлымның әкесі Владимирге де таңғаламын. Мен – анамын! Бұл өмірге көзқарасымды түбегейлі өзгертті. Енді мен Алланың әр бергеніне шүкір етем, өмірді жаңа қырынан таныдым. Ұлымның көзімен әлемге қарауды үйрендім, — деп жазды тележүргізуші.

Нұржігіт ана болудың қадірі мен қасиетін де ерекше атап өтті.

— Ана болу – үлкен мәртебе. Ішіңде жаңа өмірді тоғыз ай көтеру, өз сүтіңмен асырау, түн ұйқыңды төрт бөлу – осының бәрі үлкен жауапкершілік пен махаббаттың көрінісі. Ең бастысы – шексіз сенім: бәрі жақсы болады деп сену! – дейді ол.

Айта кетейік, Дана Нұржігіт бұған дейін ұлы жайлы жазбасында өте жылы пікірлер айтып, ана болу оның өміріндегі ең үлкен бақыты екенін бірнеше рет атап өткен.