RUS
SMARTNEWS.KZ басылымының хабарлауынша, Жетісу облысына қарасты Сарқан қаласында суармалы су тағы да православ зиратын басып қалды. Әкімдіктің мәліметінше, бұған жергілікті тұрғынның санитарлық каналды өз бетінше жауып тастауы себеп болған.
Әлеуметтік желілерде зираттағы жағдай түсірілген видео тарады. Видео авторының айтуынша, зират аумағы батпаққа айналып, төменгі бөліктегі бейіттер судың астында қалған.
«Міне, қанша су келіп жатыр. Диқандар арықтарды тазаламай қойғаннан осылай болды. Соңында бейіттер су астында қалды. Суды ағызып жатыр», – дейді кадр сыртындағы әйел дауысы.
Кадрда опырылған зираттар, су ішінде қалқып жүрген гүл шоқтары мен айқыштар анық көрінеді.
Әкімдік: су тоқтатылды, каналды бір тұрғын жауып тастаған
Сарқан қаласының әкімдігі бұл жағдайға жедел әрекет еткенін хабарлады. Су тоқтатылған.
«Әкімдік шұғыл шара қабылдады: техника мен жұмысшылар жұмылдырылды, нәтижесінде судың келуі тоқтатылды. 2024 жылы зиратты қорғау мақсатында санитарлық канал қазылған болатын. Алайда көктемде, православ мерекесі қарсаңында, қала тұрғындарының бірі каналдың алдын өз бетімен жауып тастаған. Соның салдарынан су канал арқылы кетпей, зират маңында жиналып қалды. Осыған байланысты акимат тұрғындарға судың өтуін қалпына келтіру қажеттігін ресми түрде ескертті», – деп мәлімдеді әкімдік.
Бұл – бірінші рет емес
Айта кетейік, былтыр маусымда да дәл осы зират жақын маңдағы соя егістігін суару салдарынан су астында қалған болатын. Ол кезде акимат фермердің жері мәжбүрлеп алынатынын мәлімдеген.
«Участок иесі бірнеше рет санитарлық аймақ пен су бұру жүйесін жасау керектігі туралы ескертілген. Бірақ ол талаптарды елемеді. Жер және су кодексі нормаларын бұзғаны үшін жерді мәжбүрлеп алып қою процесі жүргізіліп жатыр», – деген еді Сарқан ауданы әкімінің баспасөз қызметі 2024 жылы.
Сол кезде бұл іс бойынша материалдар полицияға жіберілген. Алайда барлық уәделерге қарамастан, зират тағы да қауіп астында қалды, мәселе әлі шешілмеген.
Әкімдік нақты жауап бермеді
Аудандық әкімдік жер учаскесі шынымен тәркіленді ме, қазір кімнің қарамағында, каналды жапқан тұрғын жауапқа тартыла ма, оның мақсаты не болғаны сияқты сұрақтарға әзірге жауап берген жоқ.