RUS
Трамп Сирияға салынған санкцияларды алып тастау туралы шешім қабылдағанын жариялап, алдағы сәрсенбіде Түркияда АҚШ мемлекеттік хатшысы Марко Рубио мен Сирияның өтпелі үкіметінің сыртқы істер министрі Асад әл-Шайбани арасындағы кездесуді растады.
АҚШ президентінің айтуынша, бұл шешім Сауд Арабиясының тақ мұрагері Мұхаммед бен Салманмен және Түркия президенті Режеп Тайып Ердоғанмен Сириядағы жағдайды талқылағаннан кейін қабылданған.
Ахмет аш-Шараамен кездесу
Axios басылымы Трамп пен аш-Шараа арасындағы кездесу Эр-Риядтағы Парсы шығанағы елдері мен АҚШ саммитінің аясында өтуі мүмкін екенін жазды.
The National газеті сириялық дипломатиялық дереккөздерге сүйене отырып, Трамп аш-Шарааның сөзін тыңдауға уақыт бөлуге келіскенін хабарлайды. Сирияның өтпелі президенті сәрсенбі күні Сауд Арабиясына ұшып келіп, Трамппен 45 минуттық келіссөздер өткізеді деп күтілуде. Алайда Ақ үй бұл кездесуді ресми түрде әлі растаған жоқ.
Санкцияларды алып тастау
"Санкциялардың жойылуы – президент аш-Шараа үшін басты басымдық", – дейді дереккөздер.
Сирияның жаңа басшылығы бұрынғы режимге қарсы енгізілген АҚШ пен ЕО санкцияларының ел экономикасына тигізген қысымын азайтқысы келеді.
Жақында Трамп Таяу Шығысқа сапары қарсаңында:
"Біз санкцияларға қатысты шешім қабылдауымыз керек. Мүмкін, Сирияға қатысты санкцияларды жақын арада алып тастаймыз. Біз оларға мүмкіндік бергіміз келеді," – деген еді.
Бұл мәлімдеме Сирияны он жылдан астам уақытқа созылған азаматтық соғыстан кейін қалпына келтіруге бағытталған халықаралық күш-жігердің аясында айтылды.
Дамаск бұл мәлімдемені "сириялық халықтың азабын жеңілдетуге бағытталған үміт сыйлайтын қадам" деп бағалады.