RUS
SMARTNEWS.KZ басылымының хабарлауынша, Астанада жел электр станциясын салуға бөлінген 8,5 миллиард теңгенің ұрлануына қатысты қылмыстық іс бойынша үкім шықты. Бұл туралы Астана қаласының қылмыстық істер жөніндегі ауданаралық соты хабарлады.
Сотта алаяқтық дерегі бойынша айыпталған Б. және М. есімді екі азаматқа қатысты үкім оқылды. Тергеу дерегінше, олар 2020–2022 жылдары аралығында "Ерейментау қаласында қуаты 50 МВт болатын жел электр станциясын салу" жобасы аясында "Е" ЖШС-нің (яғни, "Самұрық-Энерго" АҚ-ның еншілес компаниясы) қаражатын жымқырған.
Ұрлық жалған келісімшарттар жасау және аффилирленген компаниялар арқылы қаржыны айналдыру жолымен жүзеге асқан. Нәтижесінде мемлекетке 8,5 млрд теңгеден астам шығын келген.
Сондай-ақ, Б. 2021 жылы трансформаторлық қосалқы станцияларды жеткізу бойынша келісімшарт жасасқанымен, шарт міндеттемелерін орындамаған. Соның салдарынан "П" АҚ-ға 157 млн теңге көлемінде залал келтірілген.
Сот процесінде жәбірленушілер мен куәгерлердің айғақтары, банк үзінділері мен құжаттар жеткілікті дәлел ретінде қарастырылды. Прокурор айыпталушыларға бас бостандығынан айыру жазасын сұрады, ал сотталушылар кінәсін мойындаған жоқ.
Сот үкімі бойынша:
Б. 8 жыл 6 айға бас бостандығынан айырылып, «Құрмет» орденінен айырылды;
М. ҚК 55-бабының 2-бөлігінің 2-тармағына сәйкес, жеңілдететін жағдай (екі жас баланың болуы) ескеріліп, 6 жыл 8 айға сотталды.
Сот «Е» ЖШС-нің азаматтық талап-арызын ішінара қанағаттандырып, 8,5 млрд теңге мен 3 млн теңге сот шығынын өндіріп беруге шешім шығарды. Қалған бөлігі қараусыз қалдырылды.