RUS
SMARTNEWS.KZ басылымының хабарлауынша, 13 мамырда Тараздағы дәмханалардың бірінде Алматы облысы Іле ауданының мәслихат депутаты Нұрлан Байғазиевті ер адам соққыға жыққан. Полиция бұл деректі растады.
Депутаттың айтуынша, ол Таразға жұмыс сапарымен барған. Қаладағы дәмханалардың бірінде клиенттерімен заңгер ретінде кездесу өткізіп отырған. Телефонының қуаты таусылып, оны көрші үстелге — жанұямен отырған ерлі-зайыптылардың жанына — қуаттауға қойған. Сол кезде белгісіз ер адам оған телефонын қоюға тыйым салып, дау шыққан. Соңы төбелеске ұласып, ер адам депутатты ұрып, есінен тандырған.
«Құлағаннан кейін де ұруын тоқтатпады. Менімен бірге болған адам араша түсіп, полиция шақырды. Кейін мені ауруханаға жеткізді, бірақ ол жігітті полиция босатып жіберген», — дейді депутат.
Дәрігерлер депутаттың бет сүйегі сынғанын анықтаған. Алайда ол Таразда ота жасаудан бас тартып, полиция шақырған. Оның сөзінше, шабуыл жасаған адам кейін ауруханаға да келіп, тағы да қорқытпақ болған. Қасында тағы бірнеше адам болыпты.
«Мені сыртқа шығарып, «Әлі сөйлесеміз» деді. Ал полиция үнсіз тұрды», — дейді Байғазиев.
Қазіргі таңда шабуыл жасаған адам бостандықта жүр. Депутат шабуылдың кәсіби қызметіне қатысы бар-жоғын нақты айта алмайды.