«Шатастырып алған шығар»: Жанжал болған күннің бейнежазбасы жарияланды

SMARTNEWS.KZ басылымының хабарлауынша, Жетісу облысының мамандандырылған ауданаралық қылмыстық сотында Шерзат Полаттың өліміне қатысты іс қаралып жатыр.

Бүгінгі отырыста «Қамажай» дүкенінің ішкі камераларынан алынған жазбалар мен Талғар тұрғыны түсірген видео көрсетілді. Онда айыпталушылардың жәбірленушілерге күш қолданған сәті анық байқалады.

Бейнежазбадан кейін адвокат айыпталушы Дархан Әскентайдан әрекетін түсіндіруін сұрады.

– Нұрбол Нұрқанат Ғайыпбаевқа жақындағанда мен артынан ердім. Оны тоқтатып, балаларды ажыраттым. Сол сәтте Абзал Шынасыл мені екі рет ұрды. Маңдай тұсыма тиді, – деді ол.

Судья «неге сені ұрды?» деп сұрағанда, Әскентай: «Бәлкім, шатастырып алған шығар, ол балаларды сол күні алғаш рет көрдім», – деп жауап берді.