RUS
SMARTNEWS.KZ басылымының хабарлауынша, Астанада лифт ішінде пышақталған 5 жасар баланың анасы көпшіліктен көмек сұрап, баласының денсаулығы үшін күресіп жатыр.
Анасының айтуынша, дәрігерлер бүлдіршінге "сол жақ бет жүйкесінің жарақаттан кейінгі нейропатиясы" деген диагноз қойған. Салдарынан баланың бетінің сол жағы қозғалмай қалған.
— Бүгінде ұлымның бет бұлшықеттері жұмыс істемейді. Жарақаттан кейін бет жүйкесі зақымданып, қимыл-әрекетке толық қабілетін жоғалтты. Қазір ем-дом қажет. Соған байланысты халықтан көмек сұраймын, — дейді анасы.
Жиналатын қаражат баланың ұзақ мерзімді еміне, оңалту курстарына және физиотерапиялық шараларға жұмсалмақ.
Еске салайық, бұл оқиға 2024 жылдың ақпанында Астанадағы тұрғын үй кешендерінің бірінде болған. Лифт ішінде 14 жастағы жасөспірім пышақпен кішкентай балаға шабуыл жасап, бетіне бірнеше рет жарақат салған. Кейін белгілі болғандай, шабуыл жасаған жеткіншек психоневрологиялық диспансерде есепте тұрған және II топ мүгедегі ретінде тіркелген.
13 мамырда өткен сотта оған психикалық ауру салдарынан әрекетінің мәнін түсіне алмаған деген қорытынды жасалып, Талғар ауданы Ақтас ауылындағы мамандандырылған үлгідегі жабық мекемеге стационарлық мәжбүрлеп емдеуге жіберу туралы шешім қабылданды. Алайда бұл қаулы әлі заңды күшіне енген жоқ.