RUS
SMARTNEWS.KZ басылымының хабарлауынша, желіде танымал әнші Садраддиннің концертіне "Елге көмек" қайырымдылық қорының қаражаты жұмсалғаны туралы ақпарат тарады. Бұл соманың 50 миллион теңге екені айтылып отыр.
Заңгер Нұрсұлтан Орынбек бұл туралы пікір білдіріп, қор басшысы Ілияс Сариевтің құмар ойынға тәуелді болғанын және сахнаға шығуға ниеттенгенін атап өтті.
– Лудоманнан бөлек әнші боламын деп жүрген жігіт қой. Әнші Садраддиннің концертіне 50 млн теңге бөлді дегенді естідім. Оны көпшілік айтып жүр. Халық айтса, қалып айтпайды. Садраддиннің концертіне қомақты қаржы бөлгенін құлағым шалып қалды. Өткенде осы Сариевтің ісіне қатысты бірнеше факті шықты. Осының түбін бір зерттеп көру керек. Расымен солай болды ма? Әншінің кінәсі жоқ, бірақ бұл фактілерді тексеру керек. Егер 50 млн теңге аударғаны расталса, алданған ақша екені дәлелденсе, әнші Садраддин ар-ұят тұрғысынан халықтың ақшасын кері қайтаруы керек, – деді заңгер.
Еске салайық, Ілияс Сариевке қатысты ірі көлемдегі алаяқтық дерегі бойынша тергеу жүріп жатыр. Алматы полициясы оның үстінен 30-дан астам адамның шағымданғанын мәлімдеген. Қор жетекшісі қазіргі уақытта қамауда отыр.