RUS
SMARTNEWS.KZ басылымының хабарлауынша, Халық әртісі Майра Ілиясова марқұм Мәдина Ералиеваға қатысты көпшілік біле бермейтін тың деректі бөлісті. Бұл туралы ол журналист Динара Сәтжанға берген сұхбатында айтты.
Әншінің айтуынша, қазақ эстрадасының жарық жұлдызы Мәдина Ералиеваға кезінде 150 шаршы метрлік кең пәтерді Болат Назарбаев сыйлаған екен. Бұл жайт сол уақыттағы шоу-бизнес әлемінде де, қоғамда да көп талқыланбаған, жабық күйінде қалған дүние.
«Мәдина Ералиевамен дос болдым. Жеке өміріне де куә болдым. Оның ол кезде жолдасы болған жоқ, ажырасып кеткен еді. Біз Болат екеуін жақсы қабылдадық. Арсенді жалғыз өзі өсірді. Арсенмен менің қызым жасты болды. Менің жолдасым Мәдинаның кластасы еді. Содан жақсы араластық», – деді Майра Ілиясова.
Майра Ілиясова сұхбат барысында Болат Назарбаевқа қатысты қойылған сұраққа да ашық жауап берді. Оның сөзінше, Болат Назарбаев әнші Мәдина Ералиеваға әрдайым қолдау көрсетіп жүрген, жомарт әрі мейірімді жан болған.
«Болат Мәдинаға қамқор болды. Оның қолы көп нәрсеге жетпей, шағын пәтерде тұрып жүргенде 150 шаршы метрлік пәтер сыйлады. Оны қазақ елі білді. Болат Назарбаев өте жақсы көрді, сүйді. Қызғанатынын да естіп қалатынбыз. Мәдинаның өзі маған, «үйде уақытында болмасам, ол кісі маған ренжіп қалады» деп айтқан еді. Бірге тұрған жоқ, бірақ қамқор болып келіп-кетіп жүретін. Ол кісі Мәдинаны сыйлап, әндерін, дауысын, өнерін жақсы көретін. Әр әншінің өз тағдыры бар. Өмір ғой», – деді Майра Ілиясова.