RUS
SMARTNEWS.KZ басылымының хабарлауынша, белгілі әнші Тамара Асар досы әрі замандасы Мұхамеджан Тазабектің жастық шағындағы сымбатты бейнесін, беделін еске алып, жүрекжарды лебізін арнады. Бұл сөзін ол Тазабектің қызы Фатиманың ұзату тойында айтты.
Айтыскер ақын, дінтанушы Мұхамеджан Тазабек қызының ұзату тойына ерекше тарту жасап, ел ықыласын өзіне аударды. Ол болашақ келіндерге арналған 40 маңызды кеңесті кітапша түрінде дайындап, тойда таратқанын айтты."Мұхаңның беделін бөлек айтайын. 1993 жылдары, біз оқуға түскен кезде Мұхамеджан Тазабеков бүкіл мен қазақпын деген қыздың бәрін ғашық қылған. Әрбір жатақхананың есігі ашулы, дастарханы жаюлы болатын. Осы Мұхаң есіктен бір сығалар ма екен, бір төрт жол өлеңімді арнар ма екем деп армандаған Мұхаңның төрінде мен ән айтайын деп тұрмын. Мұха, ұшырғалы отырған балапаныңыздың бағы болсын", – деді Тамара Асар.
“Бұл сыйлықты қызыма ғана емес, ұзатылатын барша қазақ қыздарына, аяулы қарындастарыма арнадым. Қыздың болашақ жарына, ата-енесіне, жақындары мен екі жасқа арналған ең маңызды 40 кеңесті қамтып, кітапша етіп шығардым. Сіздер де ұзату тойда тәтті немесе қоқысқа тасталатын қағаз емес, қыздың бақыты үшін маңызды кеңестерді қысқа әрі түсінікті жеткізетін кітапшаны қоя аласыз”, – деп жазды дінтанушы.
Мұхамеджан Тазабек жақын күндері бұл кеңестерді көпшілікке қолжетімді етіп, сатылымға да шығаратынын айтты.