RUS
SMARTNEWS.KZ басылымының хабарлауынша, 5 жыл бұрын өмірден өткен белгілі журналист Бейсен Құранбектің жары Гүлмира Зербай алғаш рет ел алдына шығып, ашық сұхбат берді.
Гүлмира ханым тележүргізуші әрі журналист Дана Нұржігітке сыр шертті. Ол 30 жыл бұрынғы Бейсенмен алғаш танысқан сәтін еске алды.
Мен Ақтөбенің қызымын. Алматыға аспирантураға оқуға келіп, “Спорт” газетіне корректор болып жұмысқа тұрдым. Ол жерде Сайын Тұрсынов деген кісі қызмет істейтін. Кейін білсем, мені сырттай бақылап жүріпті. Бір күні қасынан Бейсенді ертіп келіп, менімен таныстырды. Бас киімін көзіне түсіріп киіп алған. “Гулочка, мынау менің балам – Бейсен. Мені қалай сыйласаң, осы жігітті де солай сыйла” деді де, кете барды. Ал Бейсен ашылып көп сөйлей қойған жоқ. Тек “Қай жақтансың, атың кім?” деген қысқа сұрақтар қойды. Кейін Сайын аға “Мына қыз сенің кәрі шешеңді бағатын адам” деп айтыпты. Сол сөзден кейін бе, Бейсен редакцияға жиі келе бастады. Ол кезде оның жасы 27-де еді. Сөйтіп жүріп танысып, кейін отбасын құрдық, – деп еске алды Гүлмира Зербай.
Сондай-ақ ол марқұм күйеуінен алған алғашқы сыйлығын осы күнге дейін көздің қарашығындай сақтап жүргенін де айтты.
Жастық шағымыз тоқырау кезеңіне тұспа-тұс келді. Ол кезде қаржы жағынан қиындық көп болатын. Бір жолы 8 наурызда маған тосын сый жасап, үйге сыйлықпен келді. Шынымды айтсам, мүлде күтпеген едім, себебі жағдайымыз белгілі. Сөйтсем, екі қоян сыйлапты. Сол уақыттан бері неше рет пәтер ауыстырсақ та, сол қояндарды жоғалтқан емеспіз. Балалар олармен ойнайды, кейде кіреберістегі телефон жанына қойып қояды. Бірде үйге келген кішкентай қонақ бала “Қояндарды алып кетемін” деп жылап алған. Бірақ Бейсекең екеуміз үшін аса қымбат дүниелер болғандықтан, бермедік. Сонда Бейсен “Қояндарды құтқару операциясын бастайық” деп, екі балаға ақша ұстатып, сол қояндарды аман алып қалған едік, – деді ол.