RUS
SMARTNEWS.KZ басылымының хабарлауынша, Жамбыл облысы Қордай ауданында 15 жастағы қызды өз әкесі мен кіндік әке-шешесі зорлады деген ақпарат тарады. Бұл туралы Stan.kz жазды.
Адвокат Азамат Талғатұлының мәліметінше, былтыр жасөспірімді 14 жасында туған әкесі зорлаған.
“Қызды зорлағанын анасы біліп, үйде айқай болған. Содан кейін әкесі өз-өзіне қол салмақ болады. Алайда әйелі жедел жәрдем шақырып, ауруханаға апарады. Сосын полицияға арыз жазады. Ер адам ауруханадан қашып шығып, өз тамырын кесіп қайтыс болады. Мұны естіген қыздың кіндік әке-шешесі оған өз әкесі зорлағанын білетінін айтып, ауылға жаман атыңды шығарамыз деп қорқытқан. Осылайша биыл наурыз айында қызға еркінен тыс ішімдік ішкізіп, жыныстық қатынасқа түсіп, зорлық-зомбылық көрсеткен”, – дейді адвокат.
Адвокаттың сөзінше, бастапқыда ерлі-зайыптылар өз әрекетін мойындамаған.
“Басында ерлі-зайыптылар өз әрекетін мойындамады. Алайда жасөспірім қыз ертесіне ауырып, жедел жәрдем шақырғанын айтты. Жедел жәрдемге сұрау жібердік, олар мұны растады. Қазір тергеу амалдары жүріп жатыр”, – дейді адвокат.
Жәбірленушінің туысының айтуынша, зорлық көрсеткен ерлі-зайыптылар қыздың анасымен араласып жүрген. Үйіне жиі келіп, қарызға ақша алдыртқан. Екі қабатты зәулім үйі барын айтып, соны 2,5% несиеге қойып, 100 миллион теңге алып беремін деп алдаған. Сосын жәбірленуші тарап олардың үстінен полиция арыз жазған.
“Қазір бұл жағдайға қатысты екі іс қозғалып жатыр. Соның бірі алаяқтық. Қызды зорлағандардың бірінің үстінен алаяқтық бойынша арыз жазып, полиция бөлімінде отырдық. Сол сәтте 15 жастағы сіңлім хабарласып, мұны ішіме сақтай алмаймын, сізге айтарым бар деді. Сосын полиция бөлімшесінде отырғанымды айтып, сонда шақырдым. Ол келіп, кіндік әке-шешесінің зорлағанын айтты", – дейді жәбірленушінің туысы.
Жәбірленушінің туысының айтуынша, ерлі-зайыптылар жасөспірім қызды өз анасынан сұрап әкеткен.
“Олар қыздың кіндік әкесі мен шешесі. Ерлі-зайыпты жасөспірімнің анасына “баламыз ертең футболдан жарысқа барады, жанында қызың бірге жүрсінші” деп алып кеткен. Үйіне жеткізген соң қызға еркінен тыс ішімдік ішкізген. Сосын жасөспірім жоғары қабаттағы бөлмеге барып ұйықтап қалған. Сол кезде ерлі-зайыптылар бөлмеге жалаңаш кіріп, қызды шешіндіріп, зорлық көрсеткен. Ер адам бірінші қызды зорлап, сосын өз әйелімен жасөспірімнің көзінше жыныстық қатынасқа түскен”, – дейді жасөспірімнің туысы.
Аталған жағдайға қатысты Stan.kz тілшісі Жамбыл облысының полиция департаментінен мән-жайды сұрап білді.
“2025 жылы 6 мамырда Қордай аудандық полиция бөліміне осы аудан тұрғынынан кәмелет жасқа толмаған қызын зорлады деген арыз түсті. Аталған дерек бойынша Қылмыстық кодекстің 120-бабының 4-бөлігімен (Жас балаға қатысты зорлау әрекеті) сотқа дейінгі тергеп-тексеру басталды. Тергеу барысында күдікті азамат пен азаматша анықталды. Қажетті сараптамалар тағайындалды. Сонымен қатар жәбірленушіні бұрын әкесінің зорлау дерегі анықталып, Қылмыстық кодекстің 120-бабы 3-2-бөлігінің 3-тармағымен (Зорлау) тергеу амалдары жүргізіліп жатыр”, – делінген хабарламада.
Полиция департаменті мәліметінше, қылмыстық процестік кодекстің 201-бабына сәйкес тергеу мүддесіне байланысты істің толық мән-жайы жариялануға жатпайды.