RUS
SMARTNEWS.KZ басылымының хабарлауынша, Еуропалық Одақ соғыстан қираған Сирияның қалпына келуіне және тұрақтануына үміт артып, бұл елге салынған барлық экономикалық санкцияларды жойды.
Сейсенбі күні ЕО Сирияға салынған соңғы экономикалық шектеулерді алып тастау туралы шешім қабылдады. Бұл қадам елге қаржылық ресурстарға қолжетімділікті жеңілдетіп, Башар Асадтың желтоқсанда құлаған режимінен кейін соғыстан қалжыраған мемлекетті қалпына келтіруді жеделдетуге бағытталған.
"Біз сириялық халыққа инклюзивті және бейбіт жаңа Сирияны құруға көмектескіміз келеді. ЕО соңғы 14 жылда сириялықтарды қолдап келді және қолдай береді", — деді ЕО-ның сыртқы саясат жөніндегі жоғарғы өкілі Кая Каллас сыртқы істер министрлерінің кездесуінен кейін.
Бұл шешім АҚШ президенті Дональд Трамптың Таяу Шығысқа сапары барысында Сирияның уақытша президенті Ахмед аш-Шараамен кездесіп, Америка енгізген барлық санкцияларды алып тастайтынын мәлімдегенінен бірнеше күннен кейін қабылданды.
"Мен Сирияға ұлылыққа қайта оралу мүмкіндігін беру үшін санкцияларды тоқтату жөнінде бұйрық беремін", — деді Трамп Сауд Арабиясындағы сөзінде.
Бұл мәлімдеме Брюссельдегі процестерді күрт жеделдетті.
ЕО ақпанның соңында энергетика секторы сияқты маңызды салаларға қатысты алғашқы жеңілдіктерді бекіткен болатын. Алайда қаржы және банк секторына қатысты бірқатар шектеулер сол күйі алынбаған еді. Дамаск бұл шектеулерді жоюды бірнеше рет сұраған.
"Оларды сақтауға еш негіз жоқ", — деген еді аш-Шараа осы айдың басында Франция президенті Эммануэль Макронмен кездесуінен кейін.
Гуманитарлық ұйымдар да санкцияларды жеңілдетуге шақырды. Олардың айтуынша, Асад билігі кезіндегі шектеулер инвестициядан қорқатын инвесторлар үшін тежеу әсерін тудырып отыр.
Сейсенбі кешке ЕО сыртқы істер министрлері экономикалық санкциялардың барлығын алып тастау туралы шешімді бірауыздан қабылдап, одақтың ішкі рәсімдерін аяқтады.