«Шерзатты ұрған жоқпын, өзі шалынып қалды»: Абзал Шынасыл кімді пышақтағанын айтты

SMARTNEWS.KZ басылымының хабарлауынша, Шерзат Полаттың өліміне қатысты қылмыстық іс бойынша басты сотталушы Абзал Шынасыл жауап беріп жатыр.

Сот отырысында Абзал тағылған айыпты жартылай мойындайтынын жеткізді.

— Досым Нұрқиястан «Эйфория» мейрамханасында екенін білдім, 15-20 минутта мен де сол жерге жеттім. Кейінірек екі қыз келді, артынан Азамат пен Шыңғыс, одан соң Думан мен Нұрбол қосылды. Бір кезде Нұрбол біреудің досын ұрып кеткенін айтты, бірақ біз оған мән бермей, би алаңына беттедік. Кейін мейрамхана жабылар уақытта Азамат пен Шыңғыстың жоқ екенін байқадым. Азамат маған хабарласып, «Нұрбол досымен бірге Менделеев көшесіндегі дүкеннің жанында біреулермен төбелесіп қалды» деді, — деді ол.

Абзалдың айтуынша, сол түні жастар стадионына жолшыбай бара жатқанда төбелес болып жатқаны жайлы ақпарат алған. 

Оқиға орнына жеткенде Нұрқанат Ғайыпбаевтың қолынан мылтық көрген.

— Нұрқанат аспанға оқ атты, кейін қаруды бізге қарай кезеді. Мен «атпа, сөйлесейік» дедім, ол болса боқтап, «атам» деді. Ол мені ата жаздады, оқ сол құлағымның жанынан өтті. Кейін бір бала қаруды тартып алмақ болды, бірақ Нұрқанат оны шалып құлатты. Сол кезде мен арт жағынан жақындап, оны ұруға тырыстым. Сол сәтте жанындағы Шерзат құлап түсті. Неден құлағанын білмеймін, шалынып қалды деп ойладым, — деді Шынасыл.

Абзалдың айтуынша, осыдан кейін ол Нұрқанатты пышақтаған.