RUS
SMARTNEWS.KZ басылымының хабарлауынша, 2025 жылдың 21 мамырында Жетісу облысының Қылмыстық істер жөніндегі мамандандырылған ауданаралық сотында Шерзат Полаттың қазасына қатысты басты сот отырыстары жалғасты.
Сотта марқұм Нұрқанат Ғайыпбаев пен басты айыпталушы Абзал Шынасыл арасындағы беттестіру кезінде жазылған бейнежазба көрсетілді. Онда Ғайыпбаев болған оқиғаны егжей-тегжейлі баяндап, Шынасылдың әрекеттерін сипаттап берді.
"Мен оны бұрын танымайтынмын. Төбелес кезінде ғана көрдім. Ол менің жиенімді өлтірді. Абзал, Нұрқияс, Равиль, Шыңғыс және екі қыз дүкенге бірге келді. Олар жанжалға алдын ала дайындалып келген сияқты. Нұрқияс Ахметті ұстап тұрғанда, екіншісі оны ұрып жатты. Мен Ахметті арашалап алмақ болдым, сол кезде төбелес басталып кетті. Бес адам – Равиль, Нұрқияс, Азамат, Абзал және Нұрбол маған қарай бет алды. Абзал қолына пышақ алып, бұлғап, курткамды тіліп өтті. Осы кезде Шерзат бізге қарай жүгіріп келді. Сол сәтте Абзал оны бірінші болып пышақтады. Мен тоқтауды сұрадым. Шерзатқа жақындап, оны құшақтап алдым. Ол 'мені пышақтады' деді. Аузынан қан кетіп жатты. Халі ауыр еді. Мен жедел жәрдем шақыруды өтіндім, бірақ ешкім тыңдамады. Нұрқиястың қолында мылтық, Абзалдың қолында пышақ болды. Бізге қарай 7-8 адам келе жатты. Олар бізді өлтіреді деп ойладым. Шерзатқа жақындап, оны қорғауға тырыстым. Біреу тебіп, біреу ұрып жатты. Артымнан Абзал пышақпен ұрды, артынан Равиль де пышақтады. Кейін Шерзатты тағы пышақтап жатқанын көрдім. Одан соң есімнен танып қалдым", – деді марқұмның ағасы Нұрқанат Ғайыпбаев.
Сол күні сотта кісі өлтірді деген жалғыз айып бойынша жауап беріп жатқан Абзал Шынасыл да түсініктеме берді. Ол Шерзатты үш рет пышақтағанын мойындады, алайда Нұрқанат Ғайыпбаевты мүлде көрмегенін айтты.
Сотта айтылған қарама-қайшы мәліметтер мен түсініксіз жайттар істің айналасындағы күмәнді күшейте түсті.