RUS
SMARTNEWS.KZ басылымының хабарлауынша, Парламент Мәжілісінің депутаты, айтыскер әрі ақын Ринат Зайытов жақында әлеуметтік желіде жариялаған терең мағынаға толы өлең жолдарымен елді елең еткізді.
Ақынның жырында қазіргі қоғамдағы кейбір құбылыстарға, әсіресе мәдениет саласындағы соңғы шешімдерге деген наразылық пен қынжылыс сөз болған.
Желіде кең таралған жазбасында Зайытов:
«О, сұмдық-ай...
О, құрғыр.
Көншір ме екен көңіл бір.
Қай залымның кеңесі?
(Даттау сізге көмілгір)Айналама қарасам,
Аспаным да көгілдір,
Жастарым да «көгілдір».
Қолын бұлғап қарсы алған,
Арманым да көгілдір,
Шымшық құсап қарсы алған,
«Тарланым» да «көгілдір»,
Тіс қайрау да шара жоқ
Үндемейсің...
Өмір – бұл.Бүгін Қазақ мәдениеті үшін жартылай қайғылы күн деуге болады», - деп өз толғанысын өлеңмен өрген.
Ол бұл жазбасын көп ұзамай парақшасынан алып тастағанымен, жыр жолдары әлеуметтік желілер мен жаңалық порталдарында тез тарап кетті. Оқырмандар мен желі қолданушылары ақынның бұл наразылығын мәдениет саласында беріліп жатқан кейбір атақ-марапаттармен байланыстырды. Көпшілік арасында мәдениетке сіңірген еңбегі нақты әрі көрнекті тұлғалардың бағаланбай, орнына түсініксіз шешімдердің қабылданып жатқаны жайлы пікірлер жиі айтылуда.
«Бұл не деген сұмдық!», «Мейрам Бесбаев, Сәкен Майғазиев сынды шын өнер иелерінің орны бөлек еді ғой», – деп ақынның жанайқайына қолдау білдіріп жатты.
Ақынның өзі болса, бұл өлеңімен нақты бір тұлғаны нысанаға алып отыр ма, әлде жалпы құндылықтар дағдарысына үн қатты ма – ол жағы белгісіз. Дегенмен, Зайытовтың жазбасы қоғамның белгілі бір бөлігінде көптен бері қордаланып жүрген сұрақтарды тағы да күн тәртібіне шығарғаны анық.
