RUS
SMARTNEWS.KZ басылымының хабарлауынша, 23 мамырда әлемдік классикалық музыка әлемінің жас дарындарын танытатын Virtuosos шоуының 10-маусымындағы мерейтойлық екінші халықаралық жартылай финал өтеді. Бұл кезеңде Венгрия, Австрия, Черногория және Словениядан келген он талантты жас сахнада өнер көрсетеді. Олардың өнерін халықаралық қазылар алқасы бағалайды. Бұл туралы Dimashnews.com жазды.
Қазылар құрамында аты аңызға айналған опера теноры Хосе Каррерас пен әлемге танымал қазақстандық әнші Димаш Құдайберген бар. Димаш бұған дейін де жобада қазылық еткен болса, Каррерас алғаш рет қатысып отыр.
Опера жұлдызының сахнаға Concerto Budapest оркестрімен бірге эксклюзивті нөмір орындауы мен Димаштың қайта қазылар қатарына қосылуы – көрермендер тарапынан ерекше қызығушылық тудырды.
«Кез келген музыканттың мақсаты – тыңдарманға шынайы эмоция сыйлау. Музыка арқылы әсер ету – бұл өнердің ең керемет тұсы», – деді Хосе Каррерас жас таланттарды бағалаудағы кәсіби көзқарасымен бөлісіп.
Екінші жартылай финалда өнерпаздарды Димаш Құдайберген, Хосе Каррерас, Альберт Каррерас, Ван Эно, кіші Пласидо Доминго, Иштван Вардай, кіші Иштван Кохан, Андраш Келлер және Чаба Каэл бағалайды.
Венгрия атынан екі жас пианист – Ноа Хендрикс пен Мэте Палади өнер көрсетеді.
