RUS
SMARTNEWS.KZ басылымының хабарлауынша, АҚШ президенті Дональд Трамп Еуроодақты «қиын әріптес» деп атап, Еуропадан келетін тауарларға 1 маусымнан бастап 50 пайыздық жаңа баж салығын енгізуді ұсынды. Бұл туралы ол өзінің әлеуметтік желідегі парақшасында жазды. Оның айтуынша, ЕО-мен жүргізіліп жатқан сауда келіссөздері «еш нәтиже бермей отыр».
Трамп Еуроодақтың АҚШ-пен саудада кедергілер жасап отырғанын алға тартты. Оның сөзінше, ЕО енгізген тарифтер, қосымша құн салығы, сот істері мен басқа да тосқауылдар АҚШ-тың сауда балансында жыл сайын 250 миллиард доллар дефицит тудырып отыр.
Билікке келген сәттен бастап Трамп «Американы қайтадан ұлы елге айналдыруға» уәде берді. Соның ішінде экономикалық қуатты күшейтуге басымдық беріп отыр. 2 сәуірде ол 185 елден келетін импортқа қатысты жаңа жоғары кедендік жүйе енгізді. Бұл жүйені жұмсартуға бағытталған келіссөздерді бірнеше ел, соның ішінде Еуроодақ та бастап кеткен. Алайда Вашингтон ЕО-дағы «ұжымдық әрекетсіздік» бұл процесті тежеп отырғанын айтады.
Сонымен қатар Трамп Apple компаниясына АҚШ-та iPhone өндірісін іске қосуды талап етті. Әйтпесе, 25 пайыздық салық салынатынын ескертті. Қазіргі уақытта Apple-дің негізгі зауыттары Қытайда, Үндістан мен Вьетнамда орналасқан.