RUS
SMARTNEWS.KZ басылымының хабарлауынша, Қытайдың Таншань қаласынан Астанаға арналған алғашқы екі LRT пойызы жөнелтілді. Жаңадан шығарылған вагондар елордаға 2025 жылдың маусым айында жеткізіледі.
Жөнелту рәсіміне Қазақстан тарапынан "City Transportation Systems" ЖШС басқарма төрағасы Асылбек Дүйсебаев, ал Қытай тарапынан жылжымалы құрам өндіруші CRRC Tangshan Co., Ltd зауытының басқарма төрағасы Чжоу Цюннянь мен бас мердігер CRAEC компаниясының бас директоры Чжоу Хайвэй қатысты.
Барлығы 19 пойыз шығарылмақ. Заманауи, жүргізушісіз жүретін, төрт вагоннан тұратын бұл құрамдар автоматты басқарудың төртінші деңгейімен жабдықталған және әрқайсысы 650 жолаушыға дейін тасымалдай алады.
Фото: City Transportation Systems
LRT пойыздары 1881 жылы құрылған, Қытайдың теміржол саласындағы ең ірі әрі көне зауыттарының бірі — CRRC Tangshan кәсіпорнында жасалуда. Алғашқы екі пойыз Астанаға 2025 жылдың маусымында жетсе, қалған 17 құрамды осы жылдың соңына дейін жеткізу жоспарланған. Желі сынақтан қыркүйек айында өткізіле бастайды.
Қазіргі таңда Астанадағы LRT жобасының негізгі құрылыс жұмыстары аяқталуға жақын. Қалада жол төсеу, станция қасбеттерін монтаждау, эстакадаларды сырлау, сыртқы инженерлік жүйелерді қосу, эстакада астын абаттандыру және депо құрылысы жүріп жатыр.