RUS
SMARTNEWS.KZ басылымының хабарлауынша, Дағыстанда 47 жастағы танымал әнші Талисман Омарова азаматтық күйеуінің қолынан қаза тапты. Ол республикада авар тілінде ән айтатын белгілі орындаушы ретінде кең танымал болған. Ерлі-зайыпты секілді бірге тұратын жұп Каспийск қаласындағы Кавказ көшесінде пәтер жалдап тұрған. 20 мамыр күні олар спирттік ішімдік ішкен.
Дағыстанның құқық қорғау органдарының мәліметінше, сол күні екеуінің арасында жанжал шығып, мас күйдегі 34 жастағы азаматтық күйеуі алдымен Омарованы шыны бөтелкемен ұрып, кейін табамен соққы жасаған. Әйел оқиға орнында қаза тапқан.
Дағыстандағы Тергеу комитеті бұл факті бойынша кісі өлтіру бабымен қылмыстық іс қозғап, күдіктіні қамауға алуға өтініш білдірді.
«Тергеу болжамынша, 20 мамыр күні шамамен сағат 21:00-де Магомеджанов көшесіндегі пәтерде ішімдік ішіп отырған сәтте олардың арасында жанжал туындаған. Ер адам тұрмыстық заттармен әйелге бірнеше рет соққы жасап, салдарынан ол оқиға орнында көз жұмған», – делінген ведомство хабарламасында.
Қазіргі уақытта азаматтық күйеуі ұсталып, сот шешімімен 2025 жылғы 21 шілдеге дейін екі айға қамауға алынды. Бұл туралы Дағыстандағы жалпы юрисдикция соттарының бірыңғай баспасөз қызметі хабарлады.