RUS
SMARTNEWS.KZ басылымының хабарлауынша, 25 мамырға қараған түні Ресейдің Украинаға жасаған жаппай шабуылынан кейін Еуроодақтың сыртқы істер және қауіпсіздік саясаты жөніндегі жоғары өкілі Кая Каллас Мәскеуге қарсы «барынша күшті халықаралық қысым» жасауға шақырды.
«Бұл соғысты тоқтату үшін Ресейге халықаралық қауымдастықтың ең күшті қысымы қажет», – деді Каллас.
Саясаткердің айтуынша, Ресейдің түнгі шабуылдары елдің Украинаға қарсы қасақана жойқын әрекеттерін тағы бір дәлелдеді.
«Кеше түнгі шабуылдар Ресейдің Украина халқын азаптап, елді жоюды жалғастырып жатқанын көрсетеді. Қаза тапқандардың арасында балалар бар екені – ерекше ауыр. Жүрегім сол отбасылармен бірге», – деп жазды Каллас X (бұрынғы Twitter) желісінде.
Сол күні Украина президенті Владимир Зеленский де одақтастарын Ресейге қарсы жаңа санкциялар енгізуге шақырды.
«Әрбір террористік соққы – жаңа санкцияларға толық негіз. Ресей бұл соғысты созып отыр және күн сайын адам өлтіруді жалғастыруда. Демалыс күндері әлем тынығуы мүмкін, бірақ Украинадағы соғыс тоқтамайды. Бұл үнсіздік – Путинді ғана жігерлендіреді. Ресей басшылығына шынайы қысым болмайынша, бұл қатыгездік тоқтамайды», – деп жазды ол Telegram парақшасында.
Украина билігінің мәліметінше, 25 мамырға қараған түні Ресей әскері Украина аумағына шамамен 300 дрон және 70-ке жуық түрлі зымыран (соның ішінде баллистикалық) атқан.
Киев және Киев облысы, Житомир, Хмельницкий, Тернополь, Чернигов, Сумы, Одесса, Полтава, Днепр, Николаев, Харьков және Черкассы облыстары шабуыл нысаны болған.
Зеленскийдің айтуынша, Киевтегі ұлттық университеттің жатақханасы мен бірқатар кәсіпорындарға зақым келген.
«Қайтыс болғандар бар, олардың арасында балалар да бар. Қайғырып көңіл айтамын», – деді ол.