RUS
SMARTNEWS.KZ басылымының хабарлауынша, Түркияда «Сүлеймен сұлтан», «1001 түн» сериалдары арқылы танылған Халит Эргенч пен «Чукур» телехикаясы арқылы танылған актер Рыза Коджаоғлу сотталғаны белгілі болды. Бұл туралы Anadolu агенттігі хабарлады.
Сот актерлерді Стамбулдағы жаппай наразылықтарға қатысты тергеу кезінде жалған мәлімет берді деп танып, Халит Эргенчке – 1 жыл 10 ай 15 күн, ал Рыза Коджаоғлуға – 1 жыл 8 ай түрме жазасын тағайындады.
Алайда үкімнің орындалуы кейінге шегерілді. Бұл сот шешімі кейбір шарттар орындалған жағдайда өзгеруі мүмкін екенін білдіреді.
Түрік басылымдарының мәліметінше, іс ірі наразылық акцияларымен байланысты болғанымен, нақты деректер жарияланбаған. Актерлер тергеуде куәгер ретінде жауап берген, бірақ айыптаушы тарап олар жалған ақпарат ұсынды деп мәлімдеді.
Үкім қоғамда және әлеуметтік желілерде үлкен реакция тудырды. Жанкүйерлер бұл жазаны асыра сілтеу және саяси астары бар шешім деп бағалауда. Актерлердің қорғаушылары апелляциялық шағым түсіретіндерін мәлімдеді.