RUS
SMARTNEWS.KZ басылымының хабарлауынша, Астанада LRT желісі өтетін аумақтар абаттандырылып, эстетикалық жағынан жаңартылып жатыр. Эстакаданың тіректері боялып, жол бойына мыңдаған ағаш отырғызылуда. Бұл туралы қала әкімдігі мәлімдеді.
Қала билігінің мәліметінше, LRT бағыты бойындағы көшелерге 7500-ден астам ірі ағаш отырғызылады. Әсіресе Сығанақ көшесі мен Қабанбай батыр даңғылы ерекше назарда.
– Абаттандыру мен көгалдандыру жұмыстарымен қаланың барлық аудандары қамтылады. LRT бағыты өтетін көшелерде жаяу жүргіншілерге қолайлы, көлеңкелі, жайлы кеңістіктер пайда болады. Жұмыстар «адамдар үшін қала» тұжырымдамасына сай атқарылады, – делінген әкімдік хабарламасында.
Биыл елордада 170 аула мен қоғамдық кеңістік – саябақтар, скверлер мен бульварлар абаттандырылады. Сонымен қатар 1 миллионнан аса жасыл желек – ағаш, бұта және гүл отырғызу жоспарланған.
Сығанақ көшесінде көгалдандыру жұмыстары басталып кеткен. Жыл соңына дейін бұл көшеге 1174 ағаш, 47 мыңнан аса гүлді бұталар мен көпжылдық өсімдіктер отырғызылады.
– Сығанақ көшесі транзиттік жол ғана емес, жайлы әрі заманауи қоғамдық кеңістікке айналмақ, – деді әкімдік өкілдері.
Сондай-ақ 1 мамырдан бастап LRT эстакадасының тіректері мен арқалықтары ашық сұр түске бояла бастады. Бұл реңк практикалық жағынан тиімді – кір көрінбейді, күннен, жауыннан және шаңнан қорғайды.
– Қолданылатын бояу ультракүлгін сәуле, ылғал, температура өзгерісі мен механикалық әсерлерге төзімді. Сонымен қатар, қоршаған ортаға зиянсыз, – деп мәлімдеді әкімдік.
Мұндай түс шешімдері Германия, Нидерланды және Скандинавия елдерінде кеңінен қолданылады. Сингапурда да LRT мен MRT бейтарап түстермен боялады, ал Жапонияда бояу – құрылымдық ақауларды бақылауға да көмектеседі. АҚШ пен Канадада мұндай жұмыс антивандал жабынмен қатар жүргізіледі.
– Астанадағы бояу жұмыстары кезең-кезеңімен жүзеге асады, – деп толықтырды әкімдік баспасөз қызметі.