RUS
SMARTNEWS.KZ басылымының хабарлауынша, Жетісу облысының тұрғыны тұрмыстағы әйелді жасырын жазба арқылы бопсалағаны үшін қылмыстық жауапкершілікке тартылды.
Ер адам такси жүргізушісі ретінде жолаушы әйелмен болған жеке әңгімесін видеорегистраторға жазып алып, кейін ақша талап еткен.
Оқиға биылғы жылдың қаңтар айында болған. Ер адам Алматыдан Қарабұлақ ауылына жолаушыларды тасымалдап жүрген. Жолда ол жолаушылардың бірімен әңгімелесіп, кейін қалғандары түсіп кеткеннен соң, әйелмен жеке сөйлесуді жалғастырған. Екеуі жақынырақ танысуға келіскен.
Бірнеше күннен кейін жүргізуші WhatsApp мессенджері арқылы әйелге хабарлама жолдап, егер 50 мың теңгежібермесе, олардың әңгімесін күйеуіне көрсететінін айтып қорқытқан. Отбасылық жанжалдан сескенген әйел талапты орындап, ақша аударған.
Алайда бопсалаушы мұнымен тоқтамай, қайта-қайта ақша талап ете бастаған. Бұл әрекеттің тоқтамайтынын түсінген әйел полицияға жүгінеді. Күдікті кезекті ақша алған сәтінде қолға түсті.
Сот отырысында айыпталушы А. кінәсін толық мойындап, жасаған ісіне өкініш білдірді. Сот бұл жағдайды жеңілдететін мән-жай ретінде ескеріп, 1 жыл 6 ай мерзімге бостандығын шектеу және 100 сағат қоғамдық жұмыс тағайындады.
Сондай-ақ сот шешімімен айыпталушы жәбірленушіге моральдық зиян үшін 200 000 теңге өтемақы төлеуге міндеттелді.