RUS
SMARTNEWS.KZ басылымының хабарлауынша, 50 жасқа толуына орай Астанада үлкен концерт өткізген белгілі әнші, Қазақстанның еңбек сіңірген қайраткері Досымжан Таңатаров журналист Әйгерім Сейфолланың бағдарламасына сұхбат берді.
Сұхбат барысында журналист әншінің концерті ерекше өткенін, күтпеген сәттермен есте қалғанын атап өтті. Солардың бірі – Досымжанның сахнада отырған көрермендердің алдында жұбайына гүл табыстауы. Осыған байланысты жүргізуші әншіден әйелін көпшілікке сирек көрсететін себебін сұрады.
Досымжанның айтуынша, жұбайы көпшілікке шығуға құмар емес. Телебағдарламалар мен журналистер екеуін бірге сұхбатқа жиі шақырғанымен, әнші жұбайының көзге көрінгісі келмейтінін айтып, өзінің де қызғанатынын жасырмады:
«Кейде “әйеліңмен сұхбатқа келші” деп жатады. Әрине, апарар едім. Бірақ қызғанам. Ол да өзі қаламайды. “Елдің көзі, елдің сөзі бар” дейді. Не барын маған беріп қойған, эфирге ұмтылмайды», – деді ол.
Таңатаров пен жұбайы 28 жыл бұрын үйленген. Журналист әзілмен «әйеліңізді көргенімізге 28 жыл болыпты»десе, әнші оған күле жауап беріп, жетістіктерінің көбі – жарының арқасы екенін айтты:
«Мен ерекше ештеңе жасап жүрген жоқпын. Бұрынғы аталарымыз қалай өмір сүрсе, мен де солай. Ер адамның тыныштығы – ошақ қасындағы әйелдің арқасы. Сол секілді әйелдің де бақытты болуы – еріне байланысты. Бұл – бір-бірімен тығыз байланысты өмір», – деді әнші.