Анджелина Джоли Голливудтан біржола кетті
Брэд Питтпен ажырасқан актриса жаңа өмір бастады.
SMARTNEWS.KZ басылымының хабарлауынша, АҚШ актрисасы Анджелина Джоли Калифорниядан көшіп, елдің шығыс жағалауындағы Коннектикут штатынан жылжымайтын мүлік сатып алды. Ол Лос-Анджелестегі тарихи үйін сатып, егіз балалары кәмелет жасына толғаннан кейін көптен жоспарлаған қадамын жүзеге асыра бастаған. Бұл туралы HELLO! журналы жазды.
Актриса Калифорниядан кетуді бұрыннан ойластырғанымен, Брэд Питтпен ажырасу кезінде жасалған келісімдерге байланысты қалада қалуға мәжбүр болған. 2024 жылы The Hollywood Reporter басылымына берген сұхбатында Джоли егіздері Нокс пен Вивьен 18 жасқа толғаннан кейін ғана Лос-Анджелестен кете алатынын айтқан. Биыл шілдеде екеуі де кәмелет жасына толды.
Қыркүйек айында Джоли Лос-Анджелестегі тарихи зәулім үйін 24,75 миллион долларға сатты. 1913 жылы салынған бұл жылжымайтын мүлікті актриса Брэд Питтпен ажырасуға өтініш бергеннен кейін сатып алған. Оның мақсаты – алты баласының әкесімен жиі кездесіп тұруына мүмкіндік жасау болған.
Джоли бұл үйде он жыл тұрған. Зәулім үйде алты жатын бөлме, он жуынатын бөлме, фитнес студиясы, шарап сақтайтын жертөле және ашық бассейн болған.
Актриса Коннектикутта тұрумен қатар, көп саяхаттап, Камбоджада уақыт өткізуді жоспарлап отыр. Бұл елде оның тұңғыш ұлы Мэддокс дүниеге келген.
Джолидің көшуі отбасындағы тағы бір өзгеріспен тұспа-тұс келді. Қараша айының басында Лос-Анджелес соты 18 жастағы Вивьенге әкесінің тегінен ресми түрде бас тартып, құжаттарда Вивьен Маршелин Джоли болып жазылуға рұқсат берген. Бұған дейін Мэддокс, Захара және Шайло да әкесінің тегін қолданудан бас тартқан.
Материал авторы
