Шымкенттік ер адам зообақта түйеқұсты бір тепті

SMARTNEWS.KZ басылымының хабарлауынша, Шымкенттегі зообақта жануарларға қатыгездікпен қараудың сорақы оқиғасы тіркелді. Оқиға 25 мамыр күні кешкі сағат 18:00 шамасында болған.

Зообақ әкімшілігінің мәліметінше, келушілердің бірі қоршаудан асып өтіп, түйеқұсты аяғымен теуіп, басқа жануарларды әдейі қорқытқан.

«Бұл – жабайылық. Жануарлар – ойыншық емес. Олар да ауырсынуды, қорқынышты, күйзелісті сезінеді. Егер сенде жануарларға деген жанашырлық болмаса – жолама! Кедергі жасама, зиян келтірме», – деді зообақ қызметкерлері.

Оқиғаның видеосын басқа келуші түсіріп алған. Желіде тараған бұл кадрлар жұрттың ашуын туғызды.

Зообақ ұжымы қаскөйді таныған адамдардан көмек сұрады:

«Егер бұл адамның кім екенін білсеңіздер, бізге хабарласыңыздар. Қажет болса, құқық қорғау органдарына жүгінеміз. Жануарға деген құрмет – адамгершіліктің белгісі», – делінген мәлімдемеде.