RUS
SMARTNEWS.KZ басылымының хабарлауынша, Шерзат Полат ісі бойынша адвокат Бағдат Амандосұлы істен шеттетілгенін ашық мәлімдеді.
Шерзат Полаттың өліміне қатысты резонансты сот процесінде адвокаттар арасында келіспеушілік туындап, істен тағы бір қорғаушы шеттетілді. Бұл жолы даулы шешімнің астарынан жеке амбициялар мен ықпал күресі байқалады.
Шерзаттың отбасы атынан сотқа қатысып жүрген адвокат Бағдат Амандосұлы өзінің әлеуметтік желідегі парақшасында күтпеген жерден істен шеттетілгенін мәлімдеді. Оның айтуынша, нақты себеп көрсетілмей, өз еркінен тыс процесс сыртына шығарылған.
"Мен бұл іске үлкен жауапкершілікпен кірістім. Сот – цирк емес, бұл жерде адамның тағдыры шешіледі. Біреудің имиджі үшін емес, ақиқат үшін жұмыс істедім. Алайда біреулердің атақ пен танымалдыққа ұмтылысы мені шетке ысыруына себеп болды", – деп жазды ол.
Адвокаттың айтуынша, қорғаушылар арасында шектеу қойылған ішкі ережелер мен билікке ұмтылыс байқалған.
"Сотта тек бір адам ғана сөйлейді, тек сол ғана халықтың алдына шығады, қарсы шыққандар – істен кетеді. Қалғандары – жалдамалы деген сыңайдағы сөздер айтылды. Бұл кәсіби қорғаушылар командасына тән емес жағдай", – дейді ол.
Амандосұлы өзінің жұмысы мен сұрақтарын өзгенің атынан иемдену, кәсібилікті емес, эго мен монополияны алға тарту белең алғанын айтып, сот процесін хайп құралына айналдырмауға шақырды.
"Мен шындық үшін келдім, бірақ бұл істің көлеңкесінде қалғым келмейді. Бұл – қанмен боялған трагедия, пиар алаңы емес", – деді ол.
Айта кетейік, бұған дейін дәл осы іс бойынша Жандос Палманов пен Нұрболат Ибраев та түрлі себептермен шеттетілген болатын. Осылайша, Шерзат Полаттың өліміне қатысты тергеу барысы айналасындағы адамдар арасындағы тартыстармен де қыза түскен.
Желі қолданушылары Бағдат Амандосұлын істен кім шеттеткені белгісіз болғанымен, бұл жағдайды қорғаушылар тобына кейіннен қосылған Мейірман Шекеевпен байланыстырып отыр.
Еске салсақ, сот басталар алдында марқұмның отбасы Айтбек Амангелді бастаған бастапқы адвокаттар тобынан бас тартып, жаңа заңгерлермен жұмыс істейтінін мәлімдеген еді.