RUS
SMARTNEWS.KZ басылымының хабарлауынша, Астанада кәмелетке толмаған баладан 20 миллион теңге бопсалаған қылмыстық топтың төрт мүшесі 10 жылға бас бостандығынан айырылды. Бұл туралы қалалық прокуратура мәлімдеді.
Тергеу дерегінше, сотталғандар жәбірленушінің шетелде оқуға дайындалып жатқанын, отбасында қаражат барын біліп, өзара сөз байласқан. Жасөспірімге қысым көрсетіп, тіпті қару көрсеткен. Соның нәтижесінде 4 миллион теңге алып үлгерген.
Кейін олар тағы 100 мың теңге талап еткен сәтінде ұсталды. Қалған екі күдікті де жедел іздестіру барысында қолға түскен.
Сот үкімімен барлығы Қылмыстық кодекстің 194-бабы бойынша (қорқытып алу) кінәлі деп танылып, 10 жылға сотталды. Жәбірленушіге келтірілген материалдық шығын толық өтеліп, қосымша 2 миллион теңге моральдық өтемақы өндірілді.
Айта кетейік, Қазақстан заңнамасы қорқытып алу әрекеті үшін 15 жылға дейінгі жаза қарастырады. Мұндай қылмыс үшін кей жағдайларда 14 жастан бастап жауапкершілік тағайындалады. Ал бұл жасқа толмағандар заң бойынша ата-анасының немесе қамқоршысының жауапкершілігіне жатады.