RUS
SMARTNEWS.KZ басылымының хабарлауынша, Алматыда жетінші қабаттан құлап көз жұмған Ақнәр Хамитованың өліміне қатысты іс бойынша оның жанында болған құрбысы оқиғаның өз нұсқасын айтып берді. Бұл туралы журналист Руслан Өтепбайдың YouTube арнасына айтып берді.
Дидар есімді бойжеткен марқұм Ақнәрмен төрт жыл таныс екенін, жатақханада бірге тұрғанын айтты. Ол оқиға орын алған жалдамалы пәтердің иесі. Оның сөзінше, 2024 жылдың 19 шілдесі күні Ақнәр мен тағы бір қыз — Рана, Дидардың пәтеріне қонаққа келген. Олар тамақтанып, сыра ішіп, би билеген. Дидар Ақнәрдің де сыра ішкенін растады, алайда сараптама марқұмның қанында алкоголь анықтамаған.
Дидардың айтуынша, Ақнәр түн ортасында өзін-өзі ұрып, жылай бастаған. Теледидарды сындырып, қарызы көп екенін айтқан. Артынша Ранамен жанжал шығып, Ақнәр оның анасын балағаттаған. Дидар қыздарды ажыратуға тырысқанын, ешкімді қинамағандарын мәлімдеді.
Дидар оқиға орнында түсірілген бірнеше видеоны көрсетіп, оларда Ақнәрдің өз-өзін ұрып, айқайлап жатқан сәттері барын айтты. Бірақ видеоларда зорлық әрекеті анық байқалмаған. Сондай-ақ, пәтерден табылған тәпішкедегі қызыл дақ “дарбыздан қалған” деп түсіндірді.
Ақнәрдің құлаған сәтін ешкім нақты көрмеген. Дидар ол кезде дәретханада болғанын, ал Рана екінші дәретханаға тығылып кіріп кеткенін айтады. Қыз қайтыс болғанда үй тыныш болған. Дидардың айтуынша, Ақнәр бұрында да өзіне қол жұмсамақ болған.
Оқиғадан соң Дидар жедел жәрдемге хабарласып, Ақнәрдің әпкесіне видео жіберген. Кейін полиция келіп, қыздарды тергеген. Осыдан соң Дидар бірнеше айға шетелге кеткен. Оның айтуынша, ешқандай шектеу болмаған.
Бұған дейін Дидар Ақнәрдің 13 сәуір күні де өз үйіне келіп, сыра ішкенін, жылағанын және “секіргісі келгенін” айтқанын жеткізді. Бұл туралы да Ақнәрдің әпкесіне хабарлаған. Ал университет әкімшілігі Ақнәрдің тәртібі жақсы болғанын, бұрын ешқандай тәртіп бұзушылық жасамағанын ресми түрде растаған.