RUS
SMARTNEWS.KZ басылымының хабарлауынша, Ақтаудағы жеке меншік балабақшалардың бірінде өткен салтанатты түлектер кеші әлеуметтік желілерде қызу талқыланып жатыр. Бұл туралы Lada.kz жазды.
Желіде тараған видеода алты жастағы балаларды Hummer лимузинімен мейрамханаға алып келгені көрсетілген. Бұл – балабақшамен қоштасу кеші.
Мерекелік шараға қатысқан балалар смокинг пен кешкі көйлек киіп келген. Әрқайсысына жеке сыйлық жиынтығы дайындалған. Кеш барысында тірі музыка ойнап, шоу элементтері мен түтін машиналары қосылған би ұйымдастырылған.
Кештің соңында балаларға арнайы дайындалған мантиялар табысталып, әсерлі от-шашу шоуымен қоштасу рәсімі өтті.
Алайда мұндай салтанат желі қолданушыларын екіге бөлді. Бірі – бұл шараны шектен тыс дарақылық пен ысырап деп бағаласа, екінші тарап – ата-аналардың балаларына қуаныш сыйлауға толық құқығы бар деп есептейді.
Ал Ақтау қалалық білім бөлімі бұл балабақша 2024 жылы ашылған «Alem Kids» жеке меншік мекемесі екенін мәлімдеді.
«Биыл бұл балабақшаны 24 бала тәмамдады. Шара “Шахназ” мейрамханасында өтті. Іс-шараны толықтай балабақша өзі қаржыландырды. Бұған мейрамхана жалдау, балалардың киімі, көлік пен басқа да шығындар кіреді. Ата-аналардан ақша жиналмаған», – деді қалалық білім бөліміндегілер.