RUS
SMARTNEWS.KZ басылымының хабарлауынша, Алматыда тағы бір самокат жүргізушісі жаяу жүргіншіні қағып, оқиға орнынан қашып кеткен. Жол-көлік оқиғасы салдарынан қала тұрғыны жарақат алып, ауруханаға жеткізілді.
Оқиға 2025 жылдың 26 мамырында Алтынсарин көшесі мен Абай даңғылының қиылысында болған. Ақпарат алғаш болып әлеуметтік желілерде жарияланды.
Мән-жайды білу үшін қалалық Полиция департаментіне хабарластық.
«Әуезов аудандық полиция басқармасына самокаттың қатысуымен болған жол-көлік оқиғасы туралы хабарлама келіп түсті. Белгісіз қыз самокатпен жүріп, 55 жастағы әйелді қағып кеткен. Жарақат алған әйел қалалық ауруханаға жеткізілді. Оқиғадан соң самокатшы қыз оқиға орнынан бой тасалаған. Аталған дерек бойынша тергеу басталды», – делінген полицияның ресми хабарламасында.
Қазіргі уақытта полицейлер самокат жүргізушісінің жеке басын анықтап, оқиғаның мән-жайын тексеріп жатыр. Жедел-іздестіру шаралары қолға алынған.
«Оқиға орнынан қашып кету – самокат болсын, автокөлік болсын – заң бұзушылық. Мұндай әрекет заң аясында жауапкершілікке әкеп соғады. Жауапкершіліктен жалтармау – басты қағидат. Тексеру нәтижесінде күдіктінің әрекетіне құқықтық баға беріледі», – деп мәлімдеді полиция департаменті.
Алматы қалалық қоғамдық денсаулық сақтау басқармасының мәліметінше, зардап шеккен әйел №7 қалалық клиникалық аурухананың қабылдау бөліміне жеткізілген.
«Алғашқы тексеру кезінде рентген, УДЗ, жарақатты жансыздандыру және блокада сияқты диагностикалық шаралар жасалды. Диагноз: оң қолдың білек және шынтақ сүйектерінің шиловидті өсіндісінің жабық, көп бөлікті сынуы. Сүйек сынуы жабық әдіспен қалпына келтіріліп, гипс салынды», – делінген басқарма хабарламасында.
Жедел ауруханаға жатқызуға қажеттілік болмағандықтан, әйел тұрғылықты жері бойынша емханада хирург пен травматологтың бақылауына жіберілген.