RUS
SMARTNEWS.KZ басылымының хабарлауынша, қазақстандық әйел боди-массаж қызметі көрсеткен СПА-салон ашып, заңсыз табыс тапқаны үшін сотталып, 1,5 миллиард теңге көлеміндегі мүлкі мемлекет пайдасына тәркіленді. Бұл туралы Қаржылық мониторинг агенттігі төрағасының орынбасары Жеңіс Елемесов Мәжіліс кулуарында мәлімдеді.
Оның айтуынша, азаматша Бекшуиноваға жеңгетайлық жасағаны үшін 4 жылға бас бостандығынан айыру жазасы тағайындалған. Ал бастапқыда мемлекет пайдасына 114 миллион теңге тәркіленген.
«Қаржылық зерттеу барысында оның салонда 15 қызды жұмысқа тартып, күніне әрқайсысы 3-4 клиент қабылдағаны анықталды. Қызмет құны 30 мыңнан 150 мың теңгеге дейін жеткен. Екі жылда заңсыз табыс көлемі 2 миллиард теңгеден асуы мүмкін», – деді Елемесов.
Тексеру кезінде күдіктінің 1,5 миллиард теңгеге бағаланатын активтері — пәтерлер, коммерциялық нысандар мен люкс көліктері — анықталып, тәркіленген. Бұған қоса, ол қаражаттың бір бөлігін ауыл шаруашылығы өнімдерін сатып-өткізумен айналысатын бизнеске салып, пайда тапқан.
«Бұл — қылмыстық жолмен келген табысты анықтап, оны мемлекетке қайтарудың маңызын көрсететін айқын мысал», – деді агенттік өкілі.