RUS
SMARTNEWS.KZ басылымының хабарлауынша, Мемлекет басшысы Қасым-Жомарт Тоқаев «Байқоңыр» ғарыш айлағының құрылғанына 70 жыл толуына орай арнайы видеоүндеу жасады. Бұл туралы Ақорда жеткізді.
Президент өз құттықтауында Байқоңырдың жаһандық маңызын атап өтті.
"1957 жылы дәл осы жерден алғашқы Жер серігі ұшырылып, адамзат ғарышты игеру дәуіріне қадам басты. 1961 жылы Юрий Гагарин ғарышқа аттанып, бүкіл әлемге үміт пен прогрестің белгісіне айналды. Сол кезден бері айлақтан мыңдаған спутник ұшырылып, ондаған халықаралық миссия іске асты", – деді Мемлекет басшысы.
Тоқаев Қазақстанның ғарыш саласындағы тарихи рөлін де ерекше атап өтті. Ол Байқоңырдан ғарышқа көтерілген қазақ ғарышкерлері – Тоқтар Әубәкіров, Талғат Мұсабаев пен Айдын Айымбетовті мақтанышпен еске алды.
Президенттің айтуынша, Байқоңыр – Қазақстан мен Ресей арасындағы стратегиялық әріптестіктің символы. Сонымен қатар ол ұлттық ғарыш саласының соңғы жылдары бірқатар маңызды жобаларды жүзеге асырғанын айтты.
"Қазақстан Байқоңырды халықаралық ынтымақтастықтың, ғылым мен туризмнің орталығына айналдыруға ниетті. Біз жас инженерлер мен ғалымдардың әлеуетін арттыра отырып, ғарыш нарығында өз орнымызды кеңейтуге ұмтыламыз", – деді Тоқаев.
Мемлекет басшысы Байқоңыр қаласының тұрғындарына да алғыс айтты. Ол олардың табанды еңбегі мен тарихи мұраны сақтаудағы рөлін ерекше бағалады.
"Ғарыш саласы – бүкіл адамзатты ортақ мақсаттарға жетелейтін күш. Байқоңыр алдағы уақытта да жаңашылдық пен ғылыми-техникалық прогрестің ошағы болатынына сенемін", – деді Президент.