RUS
SMARTNEWS.KZ басылымының хабарлауынша, Германия канцлері Фридрих Мерц Израиль премьер-министрі Биньямин Нетаньяхумен телефон арқылы сөйлесіп, Газа секторындағы бейбіт тұрғындарға шұғыл гуманитарлық көмекті арттыруға шақырды. Бұл туралы Германия үкіметінің ресми өкілі Штефан Корнелиус Берлинде мәлімдеді.
Мерц Израиль үкіметін "жеткілікті көлемде көмек көрсетіп, оның қауіпсіз және әділ бөлінуін қамтамасыз етуге" үндеді. Сонымен қатар, канцлер Израильдің қауіпсіздігі мен егемендігін Германияның мемлекеттік доктринасының бір бөлігі екенін атап өтті.
Сөйлесу барысында Мерц ХАМАС ұйымының террорлық әрекеттерін айыптап, бұл қозғалысты қару-жарақтан бас тартуға шақырды. Канцлер алдағы уақытта барлық тұтқындардың босатылып, атысты тоқтату туралы келісімге келуге үміт білдірді.
"Федералды үкімет қазір де Израиль мен Палестина мемлекеттерінің қатар өмір сүруін көздейтін екі мемлекеттілік шешімді бейбіт болашақтың ең ұтымды жолы деп санайды", — деді Корнелиус.
Алайда Мерц Израиль армиясының Газа секторындағы әрекеттеріне қатысты алаңдаушылық білдіріп, "бейбіт тұрғындардың шектен тыс зардап шегіп жатқанын терроризммен күреспен ақтауға болмайды" деп мәлімдеді. Бұл туралы ол 26 мамыр күні Берлиндегі Europaforum шарасында сөйлеген сөзінде айтты.
"Шын айтсам, мен Израиль армиясының Газа секторындағы нақты мақсатын түсінбеймін. Біз бұны анық әрі ашық айтуымыз керек", — деді канцлер.
Десе де, ол Германия Израильге қатысты көпшілік алдында пікір білдіруде барынша ұстамды болуы тиіс екенін мойындады. Соған қарамастан, "халықаралық гуманитарлық құқық нормалары бұзылған жағдайда, үнсіз қалуға болмайтынын" айтты.