RUS
SMARTNEWS.KZ басылымының хабарлауынша, Ұлыбритания билігі жаңа әскери стратегияны жариялап, ел армиясын тұрақты соғысқа дайындық режиміне көшіруде. Бұл туралы премьер-министр Кир Стармер мәлімдеді.
Жаңа жоспарға сәйкес, Ұлыбритания 12 жаңа сүңгуір қайық пен 6 оқ-дәрі шығаратын зауыт салады. Сонымен қатар, алдағы жылдары елде мыңдаған ұзақ қашықтыққа ұшыратын қару шығарылып, әуе және зымыранға қарсы қорғаныс жүйелеріне инвестиция салынады.
"Біз Ұлыбританияда кемінде алты оқ-дәрі зауыты саламыз. Мыңдаған жаңа жұмыс орны ашылады. Сондай-ақ, Корольдік флотты дрондар, әскери кемелер мен ұшақтарды біріктірген гибридті күшкеайналдырамыз", – деді Стармер.
Ұлыбритания ядролық оқтұмсықтарды жаңартуға және жасанды интеллект пен киберқауіпсіздікке инвестиция құюға 15 миллиард фунт стерлинг (шамамен 18 млрд еуро) бөлуді жоспарлап отыр.
Премьер-министр Ресейді нағыз қауіп деп атап, ең тиімді қорғаныс – соғысқа әзір болу екенін айтты.
Қорғаныс министрі Джон Хили де:
"Путиннің Украинаға басқыншылығы бізге маңызды сабақ болды – әскери күш өнеркәсіп қуатымен өлшенеді. Біз ел ішіндегі қорғаныс өнеркәсібін күшейтіп, қарсыластарымызды сескендіреміз", – деді.
Ұлыбритания 2027 жылға қарай қорғанысқа жұмсалатын шығынды ЖІӨ-нің 2,5 пайызына дейін арттырмақ. Ал осы аптада Лондон НАТО аясында Украинаға әскери көмек көрсету мәселесін үйлестіру үшін өтетін отырысқа қатысады. Маусым соңында Гаагада өтетін НАТО саммитінде қорғанысқа кететін шығынды арттыру мәселесі талқыланбақ.